Na Mwandishi wetu
Serikali imejipambanua katika kupambana na kuenea kwa jangwa, kurejesha ardhi iliyoharibiwa pamoja na kujenga uwezo wa kukabiliana na ukame.
Imesema pamoja na juhudi hizo, imehimiza hatua za pamoja za kisayansi na zinazoendeshwa na uvumbuzi ni muhimu ili kufikia mustakabali endelevu katika kukabiliana na ukame duniani.
Naibu Waziri Ofisi ya Makamu wa Rais (Muungano na Mazingira)Khamis Hamza Khamis ameeleza hayo Desemba 04, 2024 kwenye Mkutano wa 16 wa Mkataba wa kukabiliana na kuenea kwa Jangwa (COP16) unaofanyika Riyadh nchini Saudi Arabia.
Amesema Tanzania iko tayari kushirikiana na wadau wote ili kuhakikisha kuwa matokeo ya mkutano huo yanashughulikia mahitaji ya dharura ya nchi na jamii zilizoathirika.
Amewahakikishia wajumbe wa mkutano huo kuwa Tanzania inatambua jukumu kuu la Mkataba wa Umoja wa Mataifa wa Kupambana na Kuenea kwa Jangwa (UNCCD) katika kushughulikia uharibifu wa ardhi, kuenea kwa jangwa na kustahimili ukame duniani kote.
Pia, amesema Tanzania imejitolea kuendeleza majadiliano na hatua zinazowiana na vipaumbele vya nchi vya kitaifa na malengo mapana ya Usimamizi Endelevu wa Ardhi (SLM).
Kuhusu masuala yanayohusiana na ushirikishwaji na usawa nchini,Khamis amesema Tanzania imeweka utaratibu wa kuhakikisha kwamba jamii zilizo katika mazingira magumu, hasa wanawake, vijana, na watu walio katika mazingira magumu, wanashiriki kikamilifu katika kufanya maamuzi na kufaidika na programu za kurejesha ardhi.
Ameongeza kuwa Tanzania inaunga mkono juhudi za kimataifa za kuongeza uwekezaji katika mbinu endelevu za usimamizi wa ardhi na kutetea usaidizi wa kifedha na kiufundi ili kuharakisha utekelezaji wa miradi ya urejeshaji wa
kijamii, hasa katika maeneo kame na kame.
Kuhusu Jinsia na Ushirikishwaji wa Kijamii, amesema Jamhuri ya Muungano wa Tanzania inahakikisha mipango ya marejesho ya ardhi inayozingatia jinsia ikiwa ni pamoja na umiliki wa ardhi.
Vilevile, amesema ushiriki wa wanawake na vijana katika mipango endelevu ya usimamizi wa ardhi ni muhimu kwa programu zote ambapo Serikali inahimiza uanzishwaji wa majukwaa ya kushiriki teknolojia ili kuwezesha ufikiaji wa zana bunifu za usimamizi wa ardhi kwa mataifa yanayoendelea.
Mkutano wa 16 wa Mkataba wa Umoja wa Mataifa wa Kupambana na Kuenea kwa Hali ya Jangwa na Ukame unatarajiwa kuhitimishwa Desemba 13, 2024.
