Na Mwandishi Wetu
HUDUMA ya maji imeanza kurejea katika maeneo mbalimbali ya Dar es Salaam baada ya kukamilika kwa matengenezo ya kinga ya bomba kuu lenye kipenyo cha inchi 72 katika eneo la Mpiji, Kata ya Mabwepande.
Hata hivyo DAWASA inaendelea kufuatilia usambazaji wake kuhakikisha inawafikia wananchi wote wanaohudumiwa na mtandao huo.
Akizungumza wakati wa kufuatilia usambazaji wa maji katika Wilaya ya Kinondoni, Mkurugenzi wa Uzalishaji na Usambazaji Maji wa Mamlaka ya Majisafi na Usafi wa Mazingira Dar es Salaam (DAWASA), Mhandisi Ndele Mengo, amesema huduma imeanza kuimarika na kufika katika makazi ya wananchi baada ya kukamilika kwa matengenezo hayo.
Amesema timu za usambazaji maji pamoja na mafundi zimeanza kufuatilia hali ya huduma katika maeneo mbalimbali ili kubaini changamoto zinazoweza kujitokeza na kuhakikisha maji yanawafikia wananchi kwa kiwango kinachotakiwa.
Amewataka wananchi kuendelea kuwa wavumilivu wakati usambazaji wa maji ukiendelea kurejea katika maeneo yao.
Kwa upande wake, Mjumbe wa Shina namba 5, Mtaa wa Mtakuja, Kata ya Kunduchi, William Mwaiswelo, ameishukuru DAWASA kwa juhudi za kukamilisha matengenezo na kurejesha huduma ya maji.
Amesema wananchi walikabiliwa na changamoto ya upatikanaji wa maji kwa kipindi cha matengenezo, lakini hali imeanza kuimarika baada ya kazi hizo kukamilika.
Naye mkazi wa Mtaa wa Meko, Kata ya Kunduchi, Mariam Salum, amesema maji yalianza kurejea tangu usiku na hali ya huduma imeendelea kuwa nzuri.
“Tunaishukuru DAWASA kwa sababu tulipata usumbufu kidogo wakati wa matengenezo waliyokuwa wametangaza, lakini kwa sasa huduma imeimarika na maji yanatoka kwa msukumo mzuri,” amesema Salum.
Matengenezo ya kinga katika bomba hilo yalifanyika kwa lengo la kuimarisha usalama wa miundombinu na kupunguza uwezekano wa kuathiriwa na mvua kubwa zinazotarajiwa kunyesha kutokana na El Niño.
