Na Mwandishi Wetu
Naibu Waziri Mkuu na Waziri wa Nishati, Dk. Doto Biteko amekasirishwa na kasi ndogo ya utekelezaji wa mradi wa njia ya kusafirisha umeme ya msongo wa kilovolti 400 kutoka Chalinze hadi Zuzu Dodoma ambao uliopaswa kufikia asilimia 31 lakini kwa sasa umefikia asilimia 24 tangu tangu ulivyozinduliwa Novemba mwaka 2024.
Hali hiyo ya kusuasua kwa mradi imebainika wakati Dk. Biteko alipofanya ukaguzi mradi huo katika Kijiji cha Manchali wilayani Chamwino mkoani Dodoma leo Agosti 20, 2025.
Kutokana na hali hiyo Dk Biteko amemuagiza mkandarasi wa kampuni ya TBEA ya China kuhakikisha kuwa anafidia muda wa kazi uliopotezwa wa asilimia saba ili mradi ukamilike kwa wakati kutokana na umuhimu wake nchini.
Novemba, 2024 Serikali ilikubaliana na mkandarasi kuwa mradi huo ufanyike ndani ya miezi 19 tu badala ya miezi 22 kwani wakati mradi unazinduliwa tayari kazi kubwa za awali zilikuwa zimeshafanyika ikiwemo za upembuzi yakinifu na utoaji wa maeneo.
“ Leo ni miezi saba imepita tangu tuzindue mradi sawa na asilimia 32 ya muda wote tuliokuwa tunahitaji kutekeleza mradi huu, na tulitegemea mradi kwa sasa ufikie asilimia 31 lakini katika hali ya kushangaza mradi umefikia asilimia 24 tu jambo ambalo halikubaliki.” amesema Dk. Biteko.
Ameeleza kuwa, sababu zilizotolewa na mkandarasi za kuchelewesha mradi miongoni mwao ni wananchi kugoma kutoa maeneo kwa madai ya fidia.
Ameliagiza Shirika la Umeme Tanzania (TANESCO) kutumia mapato yake ya ndani kulipa fidia wananchi waliopisha mradi.
Dk. Biteko ameeleza kuwa mkandarasi alishaagizwa asiutekeleze mradi huo kwa mazoea kutokana na umuhimu wake kwani kwa sasa miundombinu inayosafirisha umeme kwenda Dodoma kutoka mradi wa Julius Nyerere (JNHPP) kupitia kituo cha Chalinze inabeba umeme kidogo kwa takriban megawati 240 tu ambayo ni sawa na mashine moja tu kati ya mashine tisa za JNHPP, hivyo njia hiyo mpya ya umeme ya kV 400 inayojengwa ni muhimu.
