Na Mwandishi Wetu
BAADA ya siku ya Jumapili, Naibu Rais wa zamani, Rigathi Gachagua kuahirisha uzinduzi wa chama chake kipya cha kisiasa, ametangaza kuwa amerasimisha kila kitu na kwamba tukio pekee lililobaki ni uzinduzi wa chama.
Akizungumza wakati wa matangazo na vituo vya habari kutoka eneo la Mlima Kenya, DP huyo wa zamani amebainisha kuwa uzinduzi wa chama hicho utakuwa jijini Nairobi, na kuwawezesha wafuasi wake kusafiri kutoka sehemu mbalimbali za nchi kuhudhuria hafla hiyo.
Hata hivyo, alipoulizwa kuhusu jina la chama chake kipya, mbunge huyo wa zamani wa Mathira amesisitiza kuwa ataliweka jina hilo siri kama sehemu ya mkakati wake wa kisiasa.
“Sitatangaza jina la chama leo lakini chama kiko tayari na ni chama kizuri chenye katiba nzuri. Kila kitu kinafanyika lakini tutazindua chama katika sherehe kubwa sana ambayo itafanyika jijini Nairobi katika eneo litakalotangazwa.
“Hii itatuwezesha sisi sote kuja pamoja kutoka sehemu zote za nchi ili tuzindue chama chetu. Kutoka hapo mifumo yote itakuwa tayari kufanya kazi,” ameongeza.
